Flug frá Keflavík til Tallinn, höfuðborgar Eistlands og gisting þar í hóteli, við skoðum þessa skemmtilegu borg sem byggð var af Hansakaupmönnum og þýðir "Danska höfn". Hér hafa Svíar, Prússar og aðrir Þjóðverjar, auk Rússa ráðið ríkjum fyrr á öldum. Eistland er nú sjálfstætt ríki og er í ESB, gjaldmiðill Eista er evran.

Eftir morgunverð á hóteli verður farið um sveitir við Finnska flóa í rútu til Pétursborgar, 365 km. og við byrjum að kynna okkur þessa merku og einstöku borg sem stofnuð var 1703 af Pétri mikla Rússakeisara. Nevsky breiðgatan sem er aðalgata borgarinnar og heitir eftir Alexander Nevsky sem er ein þjóðhetja Rússa. Virki St. Péturs og Páls, en þar eru allir meðlimir Rómanov fjölskyldunnar grafnir, rekja má upphaf borgarinnar til virkisins sem Pétur mikli lét reisa. St. Ísaks dómkirkjan, sem lokið var við byggingu á árið 1858, en það tók 40 ár að byggja hana og önnur 18 ár að skreyta.

Pétursborg skoðuð nánar og síðan flutt um borð í skip sem liggur við festar á Nevu ánni; vel­komin um borð í hið glæsilega fljótaskip, 4*, Nikolaj Tsjerni­shevskij! Eftir skráningu hittið þið áhöfn skipsins við hana­stélsmóttöku (cocktail party) í boði skipstjóra ("snyrtilegur klæðnaður") – góð afþrey­ing og menn kynnast öðrum farþegum við upphaf sigl­ingar.

Lagt af stað í siglingu til Moskvu, á vinstri bakka árinnar Svir er bærinn Lodejnoe Pole (Лодейное Поле) höfuð­staður Leníngradhéraðs. Nafnið er tengt meginiðn íbúanna, smíði skipa og flutninga­báta. Um borð í skipinu er fullt fæði innifalið, „Full Board“, þ.e.a.s. morgunverður, hádegisverður og kvöldverður, auk skemmtana, það sem eftir er ferðarinnar til Moskvu.

Röltið um þorpið Svirstroj (Свирьстрой). Það varð til þegar áin var virkjuð þarna. Nú er þar friðsæl þyrping lista- og iðnverk­stæða. Mjög gott úrval minjagripa sem eru vandað handverk og góðar gjafir, hægt er að kynnast trúarlífi landsmanna og skoða nokkrar kirkjur og klaustur.

Síðan á tímum Péturs mikla standa hér nokkur gömul timburhús. Vytegra (Вы́тегра) var einu sinni kölluð „fimmhafahöfn“ því að héðan lá leiðin um norðvestur vatna­leið Rússlands – um Volgu-Eystrasaltsskurðinn til Eystrasalts, Hvítahafs, Kaspíahafs, Azovhafs og Svartahafs. Ekið til bæjarins Kirillov en þar búa um 8.000 manns. Bærinn var stofnaður á 14. öld og hefur því að geyma mikla sögu. Hér er margt forvitnilegt að sjá, m.a. klaustur Heilags Kyrills sem liggur við Siverkoe vatnið og íkonasafn.

Tsjerepovets (Черепове́ц) er stærsta borgin í Vologda héraði, mikil iðnaðarmið­stöð. Hún stendur á bökk­um árinnar Sheskna sem veitt var í Rybinsk lónið. Fólk settist hér að á öðru árþús­undi fyrir tímatal vort. Fornfræðingar taka til þess að fram á 9. öld hafi allur ættbálkurinn búið á þessum slóðum og síðan farið að bland­ast slavneskum þjóðflokkum.

Þá er komið til Jaroslavl (Ярослáвль) höfuðstaðar gullna hringsins, forn rússnesk borg með 550 þús. íbúum; stofnuð 1010 og keppti við Moskvu um höfuðborgartitilinn. Glæsi­bygg­ingar, götur og grænar grundir eiga sér þúsund ára sögu. Í Jaroslavl má finna úrval fornrar rússneskrar byggingarlistar. Margt í borginni er á heimsminja­skrá UNESCO.

Í dag er lokadagur siglingarinnar og lent er í Moskvu og akkerum varpað í Moskvu ána sem hlykkjar sig í gegnum stórborgina. Skip yfirgefið og hin glæsilega Moskva, stærsta borg Evrópu skoðuð og farið á hótel þar.

Moskvuborg gerð góð skil, hér er saga og menning við hvert fótmál og mjög margt að sjá. Við skoðum helstu kennileiti borgarinnar, eins og St. Basil dómkirkjuna, Rauða torgið og Kreml. Til gamans förum við einnig í verslunarmiðstöð enda má glögglega sjá lífsstíl fólksins í borginni með því að kíkja þar inn. Íbúar borgarinnar telja um 12 milljónir manna en á stór Moskvusvæðinu búa um fimmtán milljónir. Moskva er miðstöð samgangna í lofti, á landi og á vatnaleiðum. Borgin er líka miðstöð stjórnmála og menningar allra landsmanna.

Haldið áfram að skoða hina glæsilegu Moskvu, rétt er til dæmis að kynna sér einstaklega góðar almenningssamgöngur - metró, hið fræga kerfi neðanjarðarlesta sem er stundum kallað "neðanjarðarhöllin". Einnig er hugsanlegt að gera fjöldamörgum söfnum og næturlífinu góð skil.

Flug frá Moskvu, áleiðis til Keflavíkur, lending þar síðdegis að staðartíma á Íslandi.

Dagskrá er ekki endanleg og getur breyst vegna veðurs og annara utanaðkomandi skilyrða, fararstjóri og/eða skipsstjóri taka ákvarðanir um slíkt.