Georgía og Azerbædsjan 2018

sl9s 

Georgía – landið í Kákasusfjöllum    

Ferð til einstaks lands sem er frægt fyrir matarmenningu og vönduðustu vín heims! 

Þegar Guð skipt jörðinni meðal þjóða heims voru georgíumenn seinir til þar sem þeir voru við veisluhöld og þegar þeir komu var þegar búið að skipta löndunum.  Guð spurði þá hvar þeir hefðu verið og fékk þau svör að þeir hafi setið að drykkju, spurði Guð af hvaða tilefni veisluhöld hafi verið og var svarið. „Skálað var fyrir þér, fyrir okkar þjóð og fyrir heiminum“.  Guð kunni vel að meta svarið og sagði þeim að allt land væri nú úthlutað en að hann hafi haldið eftir litlum skika fyrir sig en núgæfi hann það til Georgíumanna. Þetta land er undursamlega fagurt og gestrisni landsmanna er einstök, þetta er land til að dást að og njóta að eilífu. 
Fegurð Georgíu er ómögulegt að lýsa, aðeins er hægt að syngja um hana, í hvert sinn sem Georgíumenn hafa tækifæri til kyrja þeir um fegurð landsins í margradda söngvum og kraftmikill dansinn dynur.
Náttúrufegurð landsins er rómuð og hinnar fornu sögu ber víða merki.  Frumkristni á hér djúpar rætur í kirkjum og klaustrum inn á milli ægifagurra Kákasusfjalla, þar sem snjórinn bráðnar ekki, jafnvel á sumrin.  Gróðursæld er mikil og í dölum vex gnótt ávaxta og grænmetis, auk hins rómaða vínviðar.
Skáld og listamenn hafa fengið hér innblástur og má nefna rússnesku meistarana Púshkin, Lermontov og Tolstoy í því sambandi. 

 

GEORGIA OG AZERBÆDSJAN11 d/10 n 

Tbilisi-Ananuri-Gudauri-Kazbegi-Dzhúta-Tsjaúkhi-Mtskheta-Bodbe-Signagi-Napareúli-Telavi-Gremi-Kvareli-Sheki-Shemakha-Gobústan-Bakú 

8. - 18. SEPTEMBER 2018

Dagur 1:     Flug frá KEF

Dagur 2:     Tbilisi
Lent í bítið, haldið á hótel, hvíld. Dögurður. Skoðunarferð um Tbilisi, einstæða höfuð­borg Georgíu (Grúsíu). Hún stendur á nokkrum hæðum og forn borgarhverfi klúka á stöllum í brekk­unum. Áin fagra Kúra með klettótta bakka sína rennur í gegnum borgina endi­langa. Tbilisi er einn af fáum stöðum í veröldinni þar sem rétttrúnaðarkirkja, kaþólsk kirkja, synagóga og moska standa friðsamlega í sama hverfi, Gamla bænum. Nokkrir viðkomustaðir í skoðunarferðinni: Metekhi kirkja (V. öld), Narikala virki (IV. öld), Sioni dómkirkja (VI.-VII. öld), Antsjiskhati Maríukirkja – elsta kirkja sem varðveist hefur, þrenn­ingar­musterið Tsminda Sameba – höfuðkirkja grúsnesku rétttrúnaðar­kirkj­unnar. "Gamli bærinn" er sögulegur miðbær Tbilisi við rætur Mtats­minda (Helgafjalls). Næstum hvert einasta hús í Gamla bænum er sögulegur og menn­ingar­legur minnisvarði, í þessum bæjarhluta er glaðværð ósjálfráð. Hér ganga ferða­langar um, einir eða í hópum, sumir eiga stefnumót við ástina sína við Klukku­turn­inn. Við röltum um breiðgötu kennda við Shota Rustaveli, frægt grús­neskt skáld og heim­speking frá tólftu öld. Kvöldverður. Gisting.

Dagur 3:     Tbilisi - Ananuri - Gudauri - Kazbegi
Morgunverður. Síðan lagt upp frá Tbilisi áleiðis til Stepantsminda (Kazbegi). Á leiðinni skoðum við sérkenni­legt Ananuri virkið (16. öld), sem gnæfir yfir Aragvi ánni, og sömu­leiðis sjáum við yfir undurfagurt Zhinvali lónið. Síðan er ekið fram hjá skíða­staðnum Gudauri (2200 m y.s.), farin furðuleið meðfram Tergi ánni, síðan yfir Kross­skarð (2400 m y.s.), og komum við þá til Stepantsminda (Kazbegi). Þá er farin skoð­unar­ferð um Kazbegi: sjáum kirkju  hinnar háhelgu Gergeti þrenningar (2170 m y.s.). Þegar vel viðrar blasir við undurfagurt útsýni til fjallsins Kazbek (5147 m y.s.), eins hæsta tinds í Grúsíu. Ekið til baka til Kazbegi. Kvöldverður. Gisting.

Dagur 4:     Kazbegi – Dzhúta – Tsjaúkhi – Tbilisi
Morgunverður. Síðan jeppaferð til þorpsins Dzhúta. Þá er haldið til risafjallgarðsins Tsjaúkhi með snarbrattar klettahlíðar og fjölda tinda, sá hæsti rís meira en 3800 m y.s. Hér er paradís fjallaklifrara, margir tindar misjafnlega torkleifir. Gönguferð um ægi­fagrar slóðir. Hádegisverður. Síðdegis ekið til baka til Tbilisi. Kvöldverður. Gisting.

Dagur 5:     Tbilisi – Mtskheta – Tbilisi 
Morgunverður. Skoðunarferð um forna höfuðborg Grúsíu,  Mtskheta. Borgin er á heims­minjaskrá UNESCO. Í kjallara Svetitskhoveli dómkirkjunnar (1010 - 1029) er að finna einn dýrasta helgidóm gjörvallrar kristninnar - kyrtil Krists, en kyrtilinn flutti hingað á sínum tíma Ellious, gyðingur frá Mtskheta sem varð vitni að krossfestingunni. Hér hvíla líka margir af konungum Grúsíu. Þá má sjá Samtavro klaustrið, þar sem brómberjarunnar blómgast og bera ávöxt árið um kring. St. Nino – upplýsingarmaður frá 4. öld - átti heima í grenndinni og flutti lýðnum boðskap sinn. Í kirkjunni eru varð­veitt kraftaverkaíkon Guðsmóður frá Íberíu og hins sæla Ninos, gröf Mirians kóngs og Nönu drottningar, og jarteiknir dýrling­anna sælu Abibos Nekreselis og Shios Mgvi­melis. Þá skoðum við höfuðklaustrið Dzhvari (6. öld). Hádegisverður. Haldið til baka til Tbilisi. Frjáls tími. Kvöldverður. Gisting.

Dagur 6:     Tbilisi – Bodbe – Signagi – Napareúli – Telavi - Gremi - Kvareli
Morgunverður. Haldið til Signagi – "borgar ævarandi ástar". Á leiðinni er komið við í klausturþyrpingu St. Ninos í Bodbe þorpi og við grafreit St. Ninos, sem færði Grúsíu kristindóminn. Skoðunarferð til fornu borgarinnar Signagi, sem stendur á fjallshrygg með útsýni yfir Alazani dal. Hádegisverður. Á eftir er farið í fornan vínkjallara í gamla þorpinu Napareúli og dreypt á vínum. Grúsnesk eðalvín eru varðveitt í leirámum sem nefnast Kvevri og eru þarna grafnar í jörðu. Í opnum ámum nefndum zavodi er bruggað grúsneskt vodka, tsjatsjm (45 %). Eftir smökkun eðalvína og heimsókn á vínsafnið er haldið til Telavi, stjórnmiðstöðvar Kakheti héraðs, og skoðuð minnisverð mannvirki, svo sem virki rússneska tsarins Gremi (16. öld) og Nekresi, elsta kirkja í Grúsíu, frá 4. öld. Þá er ekið til Kvareli og kvöldverður snæddur á rómantískum stað við stöðuvatnið Ilji – á boðstólum verður vín, shashlik, khinkali og aðrar kræsingar. Síðan haldið á hótel og gist.

Dagur 7:     Kvareli (GE) – Sheki (AZ)
Morgunverður. Síðan ekið yfir landamæri Georgíu og Azerbajdzhans og tekin lest til Sheki, sem er norðvestanvert í Azerbajdzhan um 380 km vestan við Bakú, höfuðborg landsins. Fornleifarannsóknir benda til að byggð þarna sé meira en 2500 ára gömul. Hádegisverður, síðan skoðunarferð um Sheki – við skoðum sumarhöllina frá 1797 með frábærum veggmyndum og dimmbláum gluggum, grjótvirki frá 18. öld, fjölmörg úlfalda­skýli frá tímum Silkileiðarinnar miklu (í mörgum þeirra er nú ferðalöngum veittur beini og þeir hýstir), moskur og bænarturna frá 18. öld, og margt fleira. Sheki er miðstöð silki­iðnaðar og heilsulinda. Kvöldverður, gist í Sheki.

Dagur 8:     Sheki – Shemakha - Bakú 
Morgunverður. Ekið til Shemakha. Skoðunarferð um borgina, eina elstu og merkustu borg landsins. Hún byggðist fyrir amk. 2500 árum, á 9. öld varð hún höfuðborg víð­feðms Shirvan-veldis, og á 18. öld Shemakhan-khandæmisins. Við skoðum stórmerkt Gyz-Galasy virkið frá 11.-12. öld. Hádegisverður. Þá tekur við Eddi-Gjúmbez graf­hýsið, „Sjöspírurnar“, þar sem líkamsleifar fjölmargra ráðamanna ríkisins eru varð­veittar, og dómmoskan Dzhúma (frá 10. öld, endurreist á 19. öld), auk ýmissa rústa allt frá 10. öld. Hér vefa menn teppi svo af ber. Ekið til Bakú og innritast á gistihús. Kvöldverður. Gist í Bakú.

Dagur 9:     Bakú - Gobústan - Bakú
Morgunverður, síðan er ekið til náttúruvættisins Gobústan. Árið 2007 var þetta svæði með einstæðum hellaristum skráð á heimsminjaskrá UNESCO. Hér er að finna um 6000 hellaristur allt frá steinöld. Hádegisverður. Síðan skoðum við hellaristur á klöppum og í hellum, hér má sjá teikningar af veiðum, helgidönsum og bústörfum, líta má ýmis dýr, báta og dularfull tákn. Haldið til baka til Bakú. Kvöldverður. Gisting.

Dagur 10:   Bakú 
Morgunverður, síðan er farið að skoða Bakú: Ateshgjakh – hof elddýrkenda, gamla bæinn „Itsjeri-Shekher“ sem var skráður á heimsminjaskrá UNESCO í desember 2000. Hádegisverður. Síðan skoðum við Meyjaturninn (12. öld), Bibi-Ejbat moskuna (12. öld), og aðrar merkar og minnisverðar byggingar, gamlar og nýjar. Kvöldverður. Gisting.

Dagur 11:   Bakú - KEF
a) Árla morguns er risið úr rekkju, menn tygja sig til heimferðar og halda út á flugvöll.
b) Morgunverður og gengið frá farangri til heimferðar. Siðan frjáls tími fram að brottför.

 

VERÐ Á FERÐALANG:

Tvíbýli: 385.000 kr
Einbýli: 454.000 kr

Innifalið í verði:

  • Gisting á 3*/4* hótelum: 4 nætur í Tbilisi, 1 nótt í Kazbegi, 1 nótt í Kvareli, 3 nætur í Bakú og 1 nótt í Sheki, hefðbundin tveggja manna herbergi
  • Fullt fæði: 9 morgunverðir, 9 hádegisverðir og 9 kvöldverðir
  • Fólksflutningar í samræmi við dagskrá
  • Íslensk fararstjórn og enskumælandi leiðsögumaður í samræmi við dagskrá
  • Kennslustund í matargerð, matur og vínsmökkun í Napareuli
  • Matur og vínsmökkun í sveitinni
  • Jeppaferðir í Gergeti, og Dzhuta - Chaukhi
  • Aðgöngumiðar á söfn, sýningar o.þ.h. samkv. dagskrá.

Ekki innifalið í verði:

  • Þjónusta ótalin að ofan
  • Aukakostnaður hótelum, s.s. mínibar, símtöl, þvottaþjónusta
  • Einkaútgjöld, svo sem þjórfé til leiðsögumanna, bílstjóra.

  1

3

2

5

6

9

12

7

13

10 

*